EALLIT miellagiddevaš áiggiid. Leatgo mis ministeriijat vai eai? Man galle gieldda mis leat? Leago buresbirgejeaddji riika, man bálvalanlágádusaide girjerádjodoaibmage gullá, goarráneamen? Galggašeimmetgo doaibmagoahtit eanet fitnodatmáimmi láhkai?
MÁNÁIDBUOHCCEVIESU plánejit hukset priváhta ruđaiguin. Stockholmmas ovttastuvvet gieldda kulturinstitušuvdna Kulturhuset ja fitnodatlágan gávpotteáhter Stockholms stadsteater.
FITNODATDOAIBMA lea njáhkamin maid bargogaskavuođaide. Helsingin Sanomat čálii cuoŋománus Helssega universitehta láibut humanisttalaš fitnodatdoalliid. Buohkat eai nu liiko dasa, goittot dalle jus fitnodatdoallin gártá veahá bákkus. Nuppe dáfus oassi nuorat sohkabuolvvas sáhttá atnit Ruoŧa Nacka málle lágan girjerádjofitnodatdoaimma miellagiddevažžan.
SUOMAS ii leat vuos vásáhus gieldda girjerádjolágádusa bealde das, mo priváhta dahje fitnodatdoaibman dikšojuvvon girjerádjolágádus doaimmašii. Fitnodatgirjerádju lea gal oahpes doaba. Ođđa bealli fitnodatdoaimma ja girjeráju ovttastahttimis lea fitnodatdoaibmagirjerádu. Seinäjoki ámmátallaskuvlla girjeráju ovddidanprošeakta čuovvu fitnodatdoaibmadutkamuša ja juohká fitnodatdoaibmama áššedovdiid dieđuid. Neahttabálvalusfidnus ohcet máhtu ja doaibmanmálliid girjeráju neahttabálvalusaid ovddideapmái muđuige.
SERVODAGA rievddadettiin maiddái girjerádjolágádus ja girjerádjodoaibma rivdet. Jus gielddaid ovttastahttet fámolaččat, de doaibmabáikkit vátnot. Šaddet stuorát skáhpponguovddážat, ávnnasháhkan várra dahkko ovtta sajis. Dahkkogo ávnnasháhkan olggobealde? Ostojitgo bálvalusat? Mii lea čohkkejuvvon bálvalusaid fálli fitnodaga, BTJ oassi girjerájuid ávnnasválljemis ja –skáhppomis boahtteáiggis? Hämeenlinna geahččalii BTJ:ain ávdnnasháhkama olggobealde. Pilohtta lea dál meattá ja BTJ:s sirdašuvvet geahččaladdamis buktaga ovddideapmái. Vuosttažettiin lea jurdda ovddidit genrei ja ávdnasiidda guoski čovdosiid.
DÁN JAGI lea doaibmagoahtán girjerádjosektora čoakkáldatpolitihkalaš bargojoavku. Dan duogážin lea jurdda álbmotlaš čoakkáldatpolitihkas. Dál kártejit sierra sektoriid dárbbuid čoakkáldagaid hálddašeamis ja čohkkejuvvon bálvalusaid fidnemis.
NABA Álbmotlaš girjeráju rolla čohkkejuvvon bálvalusaid buvttadeaddjin ja e-ávdnasiid juohkimis? Elektrovnalaš sisdoalut bissot dás duohkoge. Girjeráju vejolašvuođaid juohkkin ohcet ainge. Norgga málle, mas riikka girjjálašvuohta biddjo nehttii friddja lohkan láhkai, dáidá leat Supmii menddo divrras.
MII boahtteáiggi girjerádjobargi bargui vel báhcá? Maid galgá máhttit? ”Girjerádjosuorggi skuvlejumi eai leat sistemáhtalaččat vihkkedallan iige anus leat doarvái viiddis diehtu das, mo suorggi skuvlejupmi vástida girjerájuid dárbbu,” čálliba Nuorta-Suoma universitehta girjeráju hoavda Jarmo Saarti ja oahpahus- ja kulturministeriija kulturáššiidráđđi Hannu Sulin ođđa Kirjasto-bláđis.
GEASSEMÁNUS leat fas Girjerádjosearvvi lágidan riikkaviidosaš Girjerádjobeaivvit, main suokkardit boahtteáiggi Elerávdnji, sohkabuolvvat ja birgenvuogit-nama vuolde.Girjerádjosearvái válljejit ságadoalli ja stivrra, mii maid oasistis ovddida girjerájuid boahtteáiggi. Logi jagi geažes girjerádju lea gávpogiid ja giliid máŋggabealat kultur- ja buresbirgenguovddáš, jáhkká várreságadoalli ja evttohas Pirkko Lindberg. Dasa lea buorre ovttas viggat.
